Badminton hmanga India hmarchhak khawmpui tan a ni

06^th September, 2017

Dt. 5-8, Sept. 2017 chhung awh tur North East Zone Inter State Badminton championship, 2017 chu vawiin dt. 5.9.17 khan tan niin Mizoram Chief Minister Pu Lal Thanhawla’n R. Dengthuama Indoor Stadium ah a hawng a, inelna tan nghal niin, hmarchhak state 8 aiawh team hrang hrangte an inel nghal a ni.

Pu Lal Thanhawla chuan Badminton Association of India (BAI) kaihhruaina hnuaia Mizoram Badminton Association in he Championship a thleng thei chu lawmawm a tihzia sawiin, infiamnain inunauna tha a thlen thin thu te a tarlang a. Indona karah pawh inhmelmakna dahthaa infiamna chuan inthianthatna a thlen thin thu a sawi. Sihphir a World Class Level High Altitude Badminton Training Centre din tura Association hmalakna chu sorkar pawhin a phurpui thu a sawi a, tun atanga reiloteah a taka chantir a nih thuai a beisei thu a sawi. Chief Minister chuan khualzinte lo duat thiam leh state dang unaute laka hawihhawm chhuah a pawimawh zia te a sawi bawk.

BAI Honorary Secretary (General) Pu Anup Narang chuan Mizoram sorkarin Badminton leh infiamna dang a phurpui chu lawmawm a tih thu sawiin he championship hian hmasawnna a thlen ngei a beisei thu a sawi bawk a ni.

He hunah hian MBA President Pu C. Zorammuana, chuan Championship hawnna inkhawmah hian BWF Championship lo awm tura India ram aiawh tur, Mizo senior player 5 te inhmelhriattirna hun hman a ni a, an zinga kum upa ber Pu Ralliantawna, India ram kum 70 chunglam Men’s Singles Champion kaihhruaina hnuaiah infiammiten championship atana rinawmna thutiam an la a ni.

Hawnna inkhawmah hian Chief Minister chuan NE Badminton Championship puala buatsaih Souvenir a tlangzarh bakah Mizoram Badminton Association Official website www.mizobadminton.com leh Mobile Application “Mizoram Badminton Association” chu a tlangzarh bawk.

Salem veng branch YMA ten cheraw lam entirin, zaithiam DJ Lalvenhimin zai rimawiin kalkhawmte a awi bawk a ni.